Келесі жолы ұшақ бортындағы пышаққа назар аударыңыз. Оның ұшы дөңгеленген және өткір кесетін жүзі жоқтың қасы болуы мүмкін, мұның өз себебі бар. 11 қыркүйектен кейін борттағы қауіпсіздік ережелері әлдеқайда қатаң бола түсті. Өткір заттар ықтимал қауіп ретінде қарастырыла бастады, бұл дастарқан жасауға да қатысты болды. Сондықтан кейтеринг компаниялары профилі дөңгеленген қауіпсіз құралдарға көшті. Эконом-класта металл құралдар көбіне пластик немесе жеңілірек материалдармен ауыстырылады. Әрі мәселе тек қауіпсіздікте емес.
Авиацияда әр грамм есепте: науалар, ыдыс-аяқ пен құралдар неғұрлым жеңіл болса, ұшақтың жалпы салмағы, демек, отын шығыны да соғұрлым аз болады. Дәл осы себепті эконом-класта шыны ыдыс сирек қолданылады. Ол тек ауыр ғана емес, қатты турбуленттілік кезінде сынып, жолаушыларға қауіп төндіруі мүмкін.
Айтпақшы, авиациялық үнемдеудің ең танымал мысалдарының бірі — American Airlines тарихы. 1987 жылы компания бірінші класс жолаушыларына берілетін салаттан бар болғаны бір зәйтүнді алып тастады. Түрлі бағалаулар бойынша, бұл жылына ондаған мың доллар үнемдеуге мүмкіндік берген.
Авиациялық кейтерингтің жұмысы дәл осындай, бір қарағанда, ұсақ-түйектерден құралады.
Жолаушы дайын науаны көреді, ал оның артында салмақ есептері, қауіпсіздік талаптары, ыдыс пен құралдарды іріктеу және ұшақ әуеге көтерілгенге дейін ескеру қажет ондаған егжей-тегжей тұр.
